Tractor rally neih tum chungchanga Sorkar ngenna thehlut SC-in ngaihtuah dawn

Supreme Court chuan vawiin hian farm law thar duh lohna lantira loneituten January 26-ah Delhi-a tractor rally neih an tum chungchanga sorkarin petition a thehluh chu a ngaihtuah dawn. 

Farm law duh lohna lantira hun rei tak Delhi border-a nawrh huaihawt tawh, loneitute hian dan siam tharte sut tura an ngenna sorkarin a tihhlawhtling lo a nih chuan, Republic Day ni takah Delhi khawpuiah tractor rally pui tham tak buatsaih an tum tih an sawi a ni. 

Hemi chungchangah hian sorkar laipui chuan court-ah ngenna thehlutin, tractor rally buatsaih tum Republic Day lawmna tihbuai thei leh, buaina chawk chhuah thei thil a ni tiin, hei hi kaltlangpui a nih chuan ram pum tana thil zahthlak tak a ni dawn a ni, a ti. Court  hnenah hian National Capital Region-ah tractor march, trolley march, vehicle march emaw hmanga tupawhin nawrh an huaihawt phalsak lo turin a ngen.

Hetih lai hian report ṭhenkhatah chuan loneitute hian Delhi khawpui chhungah rally hi neih an tum lo a, Haryana-Delhi border-ah chauh tractor rally hi kalpui an tum a, Republic Day lawmna tibuai zawnga Red Fort thleng kal an tum lo niin an hruaiten an sawi a ni.

Hun rei tak farm law thar chungchanga inremna zawnga inbiakna an neih hnuah inremna an la siam theih loh avang leh, loneituten nawrh an huaihawt chhunzawm reng avangin January 12 khan Supreme Court chuan heng dan thar pathumte hi hman theih lohin a titawp lailawk rih a ni. Member pali awmna committee pawh din nghaliin, anni hian loneitu leh sorkar laipui inkara inremna siam dan kawng an ngaihtuah pui ang. 

Farm law thar chungchangah sorkar laipui leh loneitu pawl aiawhte chuan inremna kawng zawngin naktuk hian inbiak thawh 10-na an nei leh dawn. Union agriculture minister Narendra Tomar chuan inbiakna an neih chhunzawm leh tur thu hi sawiin, loneitu zinga a tam zawk chuan dan thar hi ṭha an ti niin a sawi. Mahse Supreme Court-in a titawp rih heng dan tharte hi hman theih rih lohin a awm mai a ni, a ti. 

Naktuk aṭanga inbiakna neih leh turah pawh loneitute chuan sorkar hnenah farm law tharte sut tura ngen lo a, siamṭhat an duh dante an hrilh a, an sawiho theih ngei a beisei thu a sawi bawk.