India leh China ten ramri chin chinfelna tur zawh thuai tum

India leh China chuan a rang lama ram pahnih inrina, ramri mumal zawka chinchiahna chinfel a nih thuai theih nan 'Early and Substantial Harvest' tih hming vuahin thawhhona thar hmanga hma la zel turin inremna an siam. He inremna hi Beijing-a Special Representatives (SR) te inkhawm vawi 25-na neih zawh taka inremna point 8 tihchhuahah an tarlang.

Thudawng danin, India National Security Adviser (NSA) Ajit Doval leh China foreign minister Wang Yi te inbiakna hlawhtling tak neih zawhah he ruahmanna hi a taka kalpui a ni dawn a ni. Ram pahnih ramria buaina leh in hriat thiam lohna a thlen loh nan border military hotline thar pahnih siam belh a ni dawn a, military commander chin chunglam inkawm hranna hmun tur hmun hnih dang pawh ruahman a ni.

Hemi bakah hian ram pahnihte chuan ramriah hian eng thil pawh thleng mah se, sipai leh ram hruaitute kaltlang emaw WMCC emaw local commander level meeting leh inremna kawng dang neih hmanga inbiakna hmanga buaina leh harsatna awmte chinfel zel chu ram pahnih hian an remti ve ve bawk. Hei bakah hian Line of Actual Control huamchhung a ramri mumal zawka enkawl dan tur pawh an sawi ho bawk.

Ram pahnih hotute chuan border trade kaltlanga sumdawnna, Kailash Manasarovar yatra kaltlanga sakhaw thil hmanga intlawh tawnna leh inlaichinna tha zawk neih zui zelan remti a, sumdawnna hmun pathum hawn leh pawh remtih a nih thu thuchhuah siamah hian an tarlang. Ram pahnih inkar him leh ralmuang taka siam a nih theih nan inbiakna hi chhunzawm zel a ni bawk ang.