Ram Temple Trust-in thawhlawm Rs vbc 100 chuang dawng tawh

Uttar Pradesh-a Ayodhya hmuna Ram Temple sakna tur atan Ram Temple trust, Shree Ram Janmabhoomi Teerth Kshetra chuan thawhlawm, cheng vaibelchhe 100 chuang a dawng tawh niin Trust general secretary Champat Rai chuan a sawi. 

Ram Temple Trust hian January 15 aṭang khan temple sakna tur atan hian mipuiah contribution campaign an nei ṭan a, February 27 thleng an nei ang. Hemi chhungah hian ram chhung hmun hrang hranga Hindu sakhaw zuitute chu temple sakna tura an phal ang zat thawh turin an sawm dawn a ni. 

President Ram Nath Kovind chu temple sakna tura thawhlawm thawh hmasa ber niin, fund-raising drive ṭanni kar liam ta Zirtawpni khan Rs 5,00,100 a thawh a ni. Madhya Pradesh chief minister Shivraj Singh Chouhan pawhin Rs nuai khat a thawh bawk. 

Champat Rai chuan temple sak hna hi bul an ṭan tawh tih sawiin, thla 39 chhunga sak zawh hman an tum. Temple sakna atan senso ngai zat tur hi Rs vbc 1,100 vel turin Trust chuan a chhut a, temple bik cheina atan hian Rs vbc 300-400 vel hman a ni ang.