Statue of Liberty aiin Statue of Unity- in tlawhtu ngah zawk : PM Modi

Prime minister Narendra Modi chuan Gujarat-a Statue of Unity chuan US-a Statue of Liberty aiin tlawhtu a ngah zawk tih nimin khan a sawi a, kum hnih liamtaa Statue of Unity hawn anih aṭang khan he hmun tlawhtu khualzin hi nuai 50 dawn an awm tawh a ni, a ti. 

PM Modi hian nimin khan video conferencing hmangin India ram hmun hrang hrang aṭanga Kevadia pana tlan tur rel pariat a vai liam a ni. PM chuan rel tam zawk tlan tir a nih dawn avangin Kevadia tlawhtu pawh nitin mi nuai chuangin an phun phah dawn tih a sawi.

Khawvela mi lim sang ber, Statue of Unity hi kum 2018, October thla khan PM hian Sardar Vallabhbhai Patel piancham vawi 143-naah a hawng a ni. Modi chuan Statue of Liberty a awm tak avangin Kevadia chu Gujarat-a block lian lo tak, hmun kilkhawr taka awm ṭhin kha khualzinte hmun tlawh duh pawimawh tak pakhat a ni ta a ni, a ti. A kalpawhna tur tihlen zel chuan tlawhtu pawh an pung chho zel dawn a ni, tiin PM chuan a sawi.