PM Modi leh Iran President Pezeshkian te Kyrgyzstan-ah inkawm

Prime minister Narendra Modi leh Iran president Masoud Pezeshkian te chu nimin Thawhṭanni khan Kyrgyzstan khawpui Bishkek-a Shanghai Cooperation Organisation (SCO) Summit vawi 26-na neih karlakah an inkawm. Hemi rual hian tunhnaia West Asia huam chhung dinhmun thlirletnate an nei nghal bawk. He inhmuhkhawmna hi West Asia (Middle East) bial boruak sosang hnua hruaitu pahnihte tualchhunga an inhmuhkhawmna hmasa ber a ni.

Inbiakna neih chhungin PM Modi chuan bial chhung ralmuanna leh muanna tluantling a awm theihnan inbiak rawnna leh diplomacy hmanga buaina hrang hrangte chinfel a pawimawh zia a sawi nawn leh a ni. Prime minister chuan bial chhunga India mi leh sa awm te venhimna chu India sorkar tana thil pawimawh hmasa ber a nih thu sawiin, thil thawn leh energy thawn kawnga harsatna awm loa a kal tluan zel a pawimawh thu a tarlang bawk.

President Masoud Pezeshkian chuan Iran in indo an duh loh thu leh tualchhung boruak ralmuang lo chu ram chhung mi zawng zawng tana hmasawnna daltu a nih thu a sawi. Hemi rual hian ram pawn aṭanga an chunga nekchepna leh tharum thawhna a thleng a nih chuan tharum hmang vekin na takin an bei let zel dawn tih a sawi.

Bishkek-a SCO Summit neih mekah hian ram hrang hrang hruaitute an tel ve chungin, ram hruaitu pahnih te hian indawrtawnna, energy leh Chabahar port hmanga ram pahnih inzawmna chhunzawm zel dante pawh an sawidun nghal bawk a ni.