Pawisa lakchhuah theih zat ennawn dawn

Sorkar laipui chuan Rs 500 leh Rs 1,000 note a tih thih hnua bank aṭanga pawisa lakchhuah theih zat bithliah a siam chu December 30 hnu lamah ennawn a nih tur thu a sawi.

Bank-a pawisa note thi dah luh theih hun hi December 30 thleng hawn a ni. Pawisa dah luh theih zatah hian bithliah siam a ni lo a, mahse a lakchhuah theih zat hi kar khatah Rs 24,000 leh, ATM aṭangin nikhatah Rs 2,500 chinah bithliah a ni thung. Sum lakchhuah theih zat bithliah a nih vang hian mipuiten harsatna an la tawk reng a, hei vang hian Surpeme Court chuan he thupek hi ennawn turin sorkar laipui a lo hriattir tawh a ni.

Sum indaih lohna avanga harsatna thleng mek chu nakkum January thla laihawlah chuan a ziaawm tawh a beisei thu Niti Aayog CEO Amitabh Kant chuan a sawi. Sorkar laipuiin tangka fai aia khawl hmanga indawrna kalpui tuma a hmalakna chu ram hmasawnna atana thil pawimawh tak a ni tih a sawi bawk.