Sipai hotu thar atan Lt Gen Bipin Rawat-a ruat

Prime Minister Narendra Modi-a kaihhruai sorkar laipui chuan khawmual sipai hotu thar atan Lt. Gen. Bipin Rawat thlan a nih thu Inrinni khan a puang a, Indian Air Force hotu atan Air Marshal BS Dhanoa ruat a ni bawk.

Sipai hotu thar atana ruat, Lt Gen. Bipin Rawat hian amah aia Lieutenant General senior zawk pahnih a kaisan khalh a ni.

Lt Gen Rawat leh Air Marshal Dhanoa-te hi an service-ah vice chief ni lai ve ve an ni a, an hna thar hi December 31 aṭangin an zawm ang. Gen Dalbir Singh leh Air Chief Marshal Arup Raha-te an thlak dawn a ni.

Rawat hi kum 1978, December khan IMA, Dehradun-ah Eleven Gorkha Rifles Fifth Battalion-ah a lut a, ëSword of Honourí pawh a lo dawng tawh a ni. Line of Actual Control-ah infrantry battalion commander a ni tawh a, Rashtriya Rifles Sector leh Kashmir Valley-a infantry battalion te a ho tawh bawk. High altitude warfare leh counter-insurgency operation lamah tawnhriat a nei ṭha hle a ni.

Dhanoa hi kum 1978 June thla khan IAF fighter stream-ah a lut a, qualified Flying Instructor niin, Kargil Ooperation lai khan fighter squadron a ho a, tlangram chhengchhe taka zan lama beihpui thlaknaah vawi tam tak a tel. Beihpui thlaknaah chanvo pawimawh tak tak a chelh tawh a, heng zingah hian Bhutan-a Indian Military Training Team chu kaihhruai≠in, fighter base commander a ni tawh a, Defence Services Staff College, Wellington-ah Chief Instructor (Air ) a ni tawh bawk. Operational command pahnihah Assistant Chief of Air Staff (Intelligence) leh Senior Air Staff Officer (chief of staff) a ni ṭhin.

Khawmual sipai hotu tur ruat chungchangah hian sorkar laipui chuan a seniority indawta dah tura kalphung an neih ṭhin chu zawm loin, Rawat-a hi a aia senior pahnih an awm chungin a dah ta a ni. Kum 1983-a Indira Gandhi prime minister a nih laiin, Gen AS Vaidhya chu a aia senior Lt General SK Sinha a awm chungin sipai hotu lu ber atan hian dah a ni tawh bawk a ni.