Purun sen man sang tur ven nan sorkar laipuiin 'Buffer Stock' pe chhuak

Ramchhung hmun hrang hranga purun sen man sang chho zel tur venna leh mipui ten awlsam zawka an mamawh angte an hmuh theihna turin sorkar laipui chuan buffer stock aṭangin purun sen Thawhlehni aṭang khan a pe chhuak ṭan.

Consumer Affairs Ministry tarlan danin, ram chhung khawpui lian hrang hrang, purun sen mamawh a sanna hmunahte thawn chhuah ṭan a ni. Mipui ten purun sen hi kg 1-ah Rs.35 chauha an lei theih nan NCCF, NAFED, Kendriya Bhandar leh Safal dawrte kaltlangin zawrh a ni dawn a ni. Delhi NCR, Mumbai, Kolkata, Chennai leh Guwahati te bakah khawpui lian dangah mobile van leh dawr ruahmante hmangin zawrh a ni ang. Purun sen hi a hmun thleng zung zung turin rel service bik "Kanda Express" hmangin Maharashtra-a Nashik aṭangin thawn chhuah ṭan a ni bawk.

Sorkar thuchhuah chuan ram chhungah purun sen tharchhuah hi a awm tawk tura chhut a nih thu leh, kum 2025-26 chhunga tharchhuah zat hi metric tonne nuai 307.37 vel zet nia chhut a nih thu a tarlang. Amaherawchu, thlai thartu leh hralh chhawng tura middlemen-te inkara thil man sàng vak tur venna atan leh mipui mamawh phuhrukna atan buffer stock aṭang hian pek chhuah a ni.

Department of Consumer Affairs chuan ram chhung hmun 570 a purun man leh thil dang mante nitin an vil reng thu tarlangin, mamawh tam dan azirin buffer stock aṭanga pek chhuah zat hi tihtam a nih dawn thu a puang bawk.