Kiren Rijiju-an Serbia president Vucic kawm, inlaichinna tihngheh zelna tur nemnghet

Parliamentary affairs leh minority affairs minister Kiren Rijiju chuan Serbia khawpui Belgrade-ah Serbian president Aleksandar Vucic inkawmna neih puiin, India leh Serbia inkara inlaichinna leh thawhhohna ṭha tak awm mek chu tihngheh zel a nih tur thu an tichiang nawn leh.

Rijiju hian Belgrade-a Palace of Serbia-ah Non-Aligned Movement (NAM) kum 65-na lawmna 'High-Level Commemorative Meeting' neih mekah India aiawhte a hruai a, meeting neih pah hian president Vucic hi a kawm nghal a ni. Rijiju chuan social media-ah post siamin, president Vucic nen in-kawmna hlawhtling tak an neih thu leh, ram pahnih inkara inzah tawnna leh thawhhona ṭha awm mek tihngheh chu an inlungrualna a nih thu a tarlang.

NAM conference-a a thuchah sawinaah Rijiju chuan, India chu NAM dintu zinga mi a nih angin khawvel ralmuanna, inremna leh ram hrang hrang thawhhona kawngah India a din tlat thu a tarlang. Khawvel geopolitics-a harsatna awm mekte hmachhawn nan leh Global South ramte hmasawnna atan thawhho a pawimawh thu a sawi bawk.

Serbia a tlawh chhung hian Rijiju hian Serbian prime minister Duro Macut leh foreign minister Marko Duric-te pawh inkawmna a neih pui a, bilateral ties leh economy kawnga thawhhonate an sawi dun. Tin, Belgrade-a Mahatma Gandhi lim-ah pangpar dahin, Serbia-a awm India mite pawh a kawm nghal bawk a ni.