Ni hnih chhungin LS member 45 suspend

Lok Sabha Speaker Sumitra Mahajan-i chuan Nilaini leh Ningani khan House rorel tihbuai zawnga khawsa member 45 a suspend. 

Member suspend-te hi  AIADMK leh TDP member-te an ni a, ni eng emaw chu House rorel thei loin an aubuai tawh a ni. 

Nilaini khan Speaker chuan AIADMK member 24-te chu rorel tibuai zawnga an khawsak chhunzawm zel avangin rorel ṭum nga ṭhu thei lo turin a hrem a, Ningani khan AIADMK leh TDP member 21-te a hrem leh bawk. Speaker chuan heng member-te hi 374A of Lok Sabha dan hnuaiah a hrem a, January 8-a Parliament thlasik ṭhutkhawm a tawp thlengin rorelnaah hian an tel chhunzawm thei dawn lo a ni. 

Lok Sabha-ah AIADMK hian member 37 neiin, TDP hian member 15 a nei a ni. Hetianga a ruala member tam tham tak chunga hremna lekkawh hi a thleng khat hle. Kum 2014 February thla khan hetihlaia House Speaker Meira Kumar-i chuan House-ah buaina an siam chhunzawm reng avangin Andhra Pradesh MP 18 chu a lo suspend tawh a ni. 

Parliament thlasik ṭhutkhawm hi AIADMK leh TDP member-ten an aubuai reng avangin rorel mumal thei loin an awm fo a, inkhawm pawh tihtawp a ngaih phah fo bawk. AIADMK hian Cauvery luia 'dam' siam tum duhloin lungawi lohna an lantir ṭhin a, TDP lam hian Andhra Pradesh tana special status pek phutin rorel inkhawm hi an aubuai reng bawk.