ESIC privatise tumna awm avangin sorkar laipui dem

Employees’ State Insurance Corporation (ESIC) 'privatise' a, mimal kuta hlan tum nia report awm chungchang chu ESIC-a inziak lut hnathawktute tan thil hlauhawm tak niin, kalpui an remtih loh thu ESIC director general Ashok Kumar Singh chuan a sawi. Hnathawktu tam zawkin a hlawkna an tel theihna tura 'Code on Social Security' hman a ṭul zawk thu a tarlang bawk.

ESIC privatise tum hi Trade Union leh Social Security rights bik zirchianna nei pawl hrang hrangte report tihchhuaha tarlan a ni a, ESIC privatise tumna hi hnathawktu rethei tak takte tan pawi lian tak tling thei tur a ni tih an tarlang. Corporation hian ram pumah damdawi-in, clinic leh Health Center sâng tel an thawhpui mek a, sorkar chuan private hospital-te nen thawh duna zawi zawia tihchangtlun chhoh a tum mek a ni. Mimal kuta dah a nih chuan a enkawlna leh enkawl zui man 'healthcare cost' chu a sang phah anga, hnathawktute tan retheihna leh harsatna thlentu tur a ni thei dawn tih zirchiangtute chuan an sawi. Trade Union hrang hrang hotute chuan sorkar laipui hnenah he ruahmanna hi sut a, a hmunhma leh hnathawh dante tihmasawn zawk turin an phut.

Ningania thuchhuah an siamah, hnathawktute tana Public Social Security Sector tana ding tlat a, privatise tumna awm zel chu duh lohna lantir nan ram chhung pum huap nawrhna 'nationwide protest' thleng pawha buatsaih an inpeih reng thu an tarlang bawk. Hei bakah hian ESIC hnuaia tel thei tur chin hlawh bithliah siam pawh tipung turin rawtna siam a lo ni tawh bawk.