SP hruaitu Azam Khan lakah thubuai ziaklut

Uttar Pradesh-a Samaj-wadi Party senior leader Mohd Azam Khan, a nupui Tazeen Fatima leh a fapa Abdullah-te chu dik lo taka thiltia puhin an laka thubuai ziahluh a ni. 

BJP hruaituin nikum December thlaa Home Secretary hnena complaint a thehluh hnuah, nimin khan Ganj police station-ah Azam Khan leh a chhungte lakah thubuai hi ziahluh a ni. Khan leh UP-a SP sorkarah cabinet minister-te a lo ni tawh ṭhin a, minister a nih laia a fapa tana birth certificate pahnih pekchhuah tira puhin a lakah hian complaint hi thehluh a ni. 

Hei bakah Khan leh a chhungte hi passport pahnih neiah puh an ni bawk a, an laka complaint thehluttu hi BJP leader Akaash Kumar Saxena a ni a, minister hlui hian passport pahnih siamna tur hian birth certificcate pahnih a nei niin a sawi. 

Complaint an theh luhah Azam Khan-a fapa Abdullah hian kum 2012, June 28 khan Rampur municipal cor-poration aṭangin birth certificate a lachhuak a, hetah hian a pianna hmun chu Rampur nia tarlan a ni. Mahse kum 2015, January 21-a Lucknow Municipal Corporation in birth certificate dang a pekchhuahah a pianna hmun hi Lucknow tia tarlan a ni thung. Heng certificate pahnih pekchhuah a nih laiin a pa Azam Khan hi urban development minister a ni.