Ayodhya case: Jan 10-ah thubuai ngaihtuah hun ruat dawn

Supreme Court chuan Ayodhya-a Ram Janmabhoomi-Babri Masjid ram buai chung-chang chu ngaihtuah hun tur chu Court-in a din bench chuan January 10 hian a ruat fel dawn tih a sawi. 

Nimin khan Chief Justice of India Ranjan Gogoi kaihhruai bench chuan Ayodhya buaina chungchanga thupek hi a tichhuak a ni. Court chuan rang taka Ayodhya chungchang ngaihtuah tura ngenna PIL thehluh pawh a hnawlsak bawk. He PIL hi nikum November thlaa advocate Harinath Ram thehluh a ni a, he buaina hi hmanhmawh taka ngaihtuah a, hun bithliah siama chumi hun chhunga rel fel turin a ngen a ni. 

Nikum December 24 khan CJI kaihhruai Supreme Court bench chuan a ngaihtuah tura ruat bench kuta Ayodhya thubuai ngaihtuah hun tur relfel tura dah an lo rel tawh a, hemi ni vek hian Union minister Prakash Javadekar chuan  Ram Janmabhoomi-Babri Masjid ram buaina hi court chuan nitinin ngaihtuah chho se tih sorkar laipui chuan a duh tih a sawi.

Kum 2010 September 30 khan Allahabad High Court chuan Ayodya-a ram inchuh, acre 2.77-a zau hi Sunni Waqf Board, Nirmohi Akhara leh Ram Lalla-te insem turin a rel a, mahse High Court rorel danah hian lungawi loin Supreme Court-ah hian ngaihtuah ṭha tura ngenna eng emaw zat thehluh a ni.