Delhi Congress president aṭangin Ajay Maken a bang

Ajay Maken chu Delhi Congress president a nihna aṭangin a bang. 

Ningani tlai khan Congress president Rahul Gandhi, Delhi Congress party affairs in-charge PC Chacko leh Maken-te hian meeting an nei a, meeting-ah Maken hian Delhi Congress president a nihna aṭanga banna hi thehlutin, Rahul Gandhi pawhin a pawmsak nghal a ni. Maken chuan party president Gandhi leh party worker-te chungah an thawhpuinaah lawmthu a sawi nghal bawk. 

Kum 54 mi, Maken hi kum 2015 Delhi assembly inthlana Congress an chakloh hnuah khan Delhi unit president atan hian dah a ni. MP atan ṭum hnih thlan a ni tawh a, Delhi Legislative Assembly member-ah ṭum thum thlan a ni tawh bawk. Delhi Chief Minister hlui Sheila Dikshit-i kaihhruai sorkarah hian Assembly speaker a lo ni tawh bawk. 

Ajay Maken hian a ban chhanah a hriselna ṭhat tawk loh chu chhuanlamah hmang mah se, central role lam pek a ni dawn zawk nia sawi a ni a, anih loh pawhin Lok Sabha inthlanpuiah a chuh rin a ni bawk.