Bangladesh MP tharte la lut Eptuten lak luh inkhawm boycott
Bangladesh Parliament member thlan tharte chu nimin khan rinawmna thu tiamtira lakluh an ni. Hetihlai hian eptu party Bangladesh Nationalist Party (BNP) leh a thawhpui party dangte chuan inthlan result hi an pawm lo tih sawiin lakluh inkhawm hi an boycott thung.
Bangladesh inthlanpui neih zawh takah Prime Minister Sheik Hasina-i party, Awami League chuan inthlan neihna seat 299 ah seat 258 an la a, an thawhpui Jatiya Party chuan seat 22 a la ve bawk. BNP hian seat nga chauh lain, a thawhpui National Unity Front (NUF) chuan seat hnih a la a ni.
Parliament member tharte lakluh inkhawm nimin chawhma dar 11 khan Parliament Oath Room-ah neih a ni a, Speaker Shirin Sharmin Chaudhury-in rinawmna thu a tiamtir a ni.
BNP Secretary General Mirza Fakhrul Islam chu inthlan neih zawh takah hmun hrang hrangah vote tihchingpen anih thu sawiin, election tribunal-ah complaint pawh an thehlut dawn tih a sawi. Inthlan result chu an pawm ve loh avangin an member thlan tlinte pawh rinawmna thu tiama lakluh an duh loh thu a sawi.
Bangladesh ram danpui hnuaiah MP thlan tharte chu thlan tlin an nih aṭanga thla thum chhungin rinawmna thu tiama lakluh tur an ni a, hemi chhunga lakluh an nih loh chuan an seat chu an kalsan a ngai dawn a ni.
Human Rights Watch pawhin Bangladesh inthlanpui neih takah tharum thawhna a thlen nasat bakah eptu lamte zalenna hrekbeh sak turin dan pawh dik lo taka hman a ni tih a sawi a, hei vang hian eptu pawlten inthlan tihchingpen nia a sawi chu chhuichiang turin a phut. Khawthlang ram sorkar eng emaw zat pawhin vote thlak nia tharum thawhna thlengte leh, thil fel tawk lo awm nia sawi chu an dem thu leh chhuichian an phut thu an sawi bawk.
BNP hian an party hma lak zel dan tur ngaihtuah tura an party president, jail-a tang mek Khaleda Zia-i hmuh phalsak turin sorkarah ngenna an thehlut bawk.
Awamani League hruaitu Sheikh Hasina-i chu January 10 hian Bangladesh Prime Minister atan lakluh a ni dawn a, a zawna PM term thum a chelhna tur leh PM a nih ṭum lina tur a ni. Hetihlai hian Parliament-a eptu lam dinhmun tur hi a la chiang thei lo a, opposition party dinhmun chang tur hian seat awm zat aṭanga 10% tal hmuh phak a ngai a ni. Jatiya Party hi eptu lamah an awm maithei nia sawi a ni.