High Court pariat-ah Chief Justice thar ruat an ni

Ramchhung hmun hrang hranga High Court pariat-ah Chief Justice thar ruat an nih thu Union Law Ministry chuan Inrinni zan khan a puang. Supreme Court Collegium-in rawtna a thlen hnuah, president Droupadi Murmu-in pawmpuina pein hemi hnu hian union law minister Arjun Ram Meghwal chuan official notification a tichhuak a ni.

Chife Justice ruat tharte hi Delhi, Bombay, Allahabad leh High Court hrang hranga judge te an ni. Delhi High Court Judge Justice Valluri Kameswar Rao chu Patna High Court Chief Justice atan ruat a ni a, Bombay High Court Judge Justice Ravindra V. Ghuge chu Calcutta High Court Chief Justice atan leh Allahabad High Court Judge Justice Mahesh Chandra Tripathi chu Bombay High Court Chief Justice atan ruat an ni.

Anni bakah Chhattisgarh High Court Judge Justice Sanjay Kumar Agrawal chu Rajasthan High Court Chief Justice-ah, Orissa High Court Judge Justice Krushna Ram Mohapatra chu Chhattisgarh High Court Chief Justice-ah, leh Gujarat High Court Judge Justice Alpesh Yashwant Kogje chu Madhya Pradesh High Court Chief Justice atan ruat an ni bawk. Allahabad High Court Judge Justice Ashwani Kumar Mishra chu Punjab and Haryana High Court Chief Justice atan leh Rajasthan High Court Judge Justice Dr. Pushpendra Singh Bhati chu Jammu & Kashmir and Ladakh High Court Chief Justice atan ruat an ni bawk.

Chief Justice tharte hian Governor hmaah rinawmna thu tiam lakna an nei zui thuai tura beisei an ni.