UN Map-ah J&K leh Ladakh-te India Official Map-a tarlang turin hriattir

United Nations (UN) in khawvel map thar hman an rawt tharah India territory, a bik takin Jammu & Kashmir leh Ladakh Union Territory-te chu India official map-a dahlan ngei a ni tur a ni tiin Ministry of External Affairs (MEA) chuan a thuchhuah siamah a tarlang. Dik lo leh rilru hruai sual thei zawnga tarlan a nih chuan pawm a ni lo ang, a ti bawk.

Pathianni khan MEA Official thupuangtu Randhir Jaiswal chuan thuthar thehdarhtute zawhna chhangin, India rorelna hmun leh ramri dik tak humhalh chu a ṭul tawh hle tih a sawi. UN General Assembly-in khawvel ram hrang hrangte landmass dik zawka lantirna tur resolution-a vote lakah India duhdan chu vote hmu tam zawk a lo nih tawh a ni.

Sorkar thuchhuah tarlan danin, September 4 khan UN-in "Correct the Map" tih resolution chu a pawm a, he resolution hian continental landmasses nih dan phung nihna dik tak lantir chu a tum ber a ni. India chuan he resolution thlawp hian vote a thlak a, mahse, UN map thar siam a nih pawhin India official map-a Jammu & Kashmir leh Ladakh tarlan chu thil nih dan dik tak zawk a nih thu Jaiswal chuan a sawi lang bawk.