Ladakh leh sorkar laipuiin vawiinah inbiakna chhunzawm dawn

Sorkar laipui leh Ladakh-a tualchhung pawl aiawhte chuan vawiin chawhnu dar 4:00 hian New Delhi-ah inbiakna an chhunzawm leh dawn. Leh Apex Body (LAB) leh Kargil Democratic Alliance (KDA) aiawhte chuan inbiakna nei tur hian nimin khan Delhi an thleng tawh a, Ministry of Home Affairs (MHA) High-Powered Committee nen inbiakna hi an nei ang.

Ladakh hi kum 2019-a Jammu & Kashmir aṭanga Union Territory-a siam a nih aṭang khan tualchhung mi leh sa, hnam hrang hrangte chuan humhalh bikna an neih theihna turin special status pek phut hian hma an lo la tawh a ni. KDA aiawh Sajad Kargili chuan, "Ladakh leilung, hnam ziarang leh tualchhung tana hnathawh turte humhalhna turin Sixth Schedule hnuaia dah turin kan nawr dawn a ni," tiin a sawi. MHA pawhin May 22-a inbiaknaah khan Article 371 hnuaiah dinhmun thar siamsak a lo tiam tawh bawk.

Ladakh Lieutenant-Governor administration chuan High Court Bench hran J&K leh Ladakh tana siam te, hill council district pasarih dinte leh ram neitute tana dan siam thar, Ladakh Autonomous Hill Development Council(Nautor Regularisation) Rule, 2026 a lo puang tawh bawk.

LAB leh KDA aiawhte hian kum liam ta chhunga lungawi lohna lantirnaa tualchhung mi thi leh hliam awmte zangnadawmna pek leh mipuite chunga police case hlihsak te pawh sorkar laipui hmaah hian nawr zui an tum. Inbiakna neih tur vang hian 'Martyrs Month' puala protest march neih tumte pawh an ṭhulh rih thu an tarlang.