Lipulekh pass kaltlangin India-Tibet insumdawnna kalpui chhunzawm leh ta

Kum ruk chuang zet a khaihlak hnuah, India leh Tibet inkara sumdawnna kawng pawimawh tak mai, Uttarakhand-a Lipulekh Pass kaltlanga insumdawn tawnna chu Pathianni aṭang khan chhunzawm a ni leh ta. Kum 2020 a Covid-19 hripui darh vang leh, Line of Actual Control (LAC) vela India leh China sipaite inbeihna leh indona thleng zui vangin he sumdawnna kawtchhuah hi khar a lo ni tawh a ni.

Indopui hnu lama trade route pawimawh tak, Uttarakhand-a Pithoragarh district chhunga awm Lipulekh Pass hmanga insumdawnna chhunzawm leh a ni hi sumdawngte leh tualchhung mipui tan ei bar hmuhna a ni leh dawn a ni. Indian border traders-ten kawng hi hmang leh tawhin, Tibet biala Lhasa leh a chhehvela insumdawn tawnna chhunzawm turin inbuatsaihna hi mumal takin a kal zui nghal a ni. Sumdawnna kalpui tur pawlte pawhin border trade pass neihna tura pawimawhte kim takin thuneitute hnen aṭangin an dawng tawh bawk.

Pithoragarh District Collector leh Land Customs Station hotute chuan tlangchhip inpawhnaa sumdawnna venhimna turin security leh customs checking-te pawh khauh taka kalpui a nih tur thu an sawi. Lipulekh kaltlang hian India aṭangin bawlhlo, thingpui, kurtai leh cosmetic bakah nitin mamawh dangte thawn chhuah a ni ṭhin a; Tibet lam atangin kel hmul, puan, tlereuh, leh raw materials dangte lak luh a ni thung. He trade route hawn chhunzawm leh hian tualchhung kuthnathawk leh sumdawngte tan hnathawh tur leh ei leh bar zawnna thar a thlen ngei beisei a ni.