PM Modi kum 25 rorelna fawng chelh pualin BJP-in thla khat awh campaign nei dawn

Prime minister Narendra Modi-a'n tualchhung politic leh public office-a hna a thawh ṭan aṭanga kum 25 tlin champha pualin, Bharatiya Janata Party (BJP) chuan ram pumah thla khat chhung awh tur campaign 'Seva Sankalp Abhiyan' an kalpui pui dawn. He campaign hi September 17, PM Modi-a piancham aṭanga ṭanin, October 17 thleng neih chhunzawm a ni ang.

BJP national president Nitin Nabin chuan Thawhlehni khan thuthar thehdarhtute hmaah an hmalakna tur hi a puang a ni. Narendra Modi hi October 7, 2001 khan Gujarat Chief Minister atan lak luh a ni a, kum 2026 October 7 hian ram hruaitu a nih kum 25-na chiah a ni dawn a ni.

Thla khat chhung awh tur hmalakna hrang hrang zingah hian mipui rawngbawlna lamin hmun pawimawh a chang dawn a. Program bulṭanna atan September 17 hian ramchhung hmun hrang hrangah blood donation camp, cleanliness drive, leh 'Ashirwad Ka Diya' buatsaih an tum a, October 2 Gandhi Jayanti-ah faina campaign lian tham tak neih chhunzawm a ni bawk ang. PM Modi-a'n kum 25 chhung politics zinkawng leh hmasawnna hna a thawhte tarlanna, digital platform leh a hmun tlawhte thlalak tarlanna exhibition buatsaih a ni ang.

BJP general secretary Vinod Tawde chu he campaign hotu ber 'National Convener' atan ruat a ni. State tinah minister pakhat, Organizational General Secretary leh hruaitu lian 5 awmin mi 7 awmna committee pawh an din nghal vek a ni. He campaign chhung hian sorkar laipui welfare scheme te chu mirethei leh mamawhtute hnen a thleng kim em tih endik leh puihna pek chu party tum ber pakhat a ni bawk.