SC-ah UPI P2M-a MDR 0.4% lak tumna khing

India ram chhunga Unified Payments Interface (UPI) hmanga dawr thil leina Rs 2,000 chung lama Merchant Discount Rate (MDR) 0.4% lakna tura sorkar thutlukna siam duh loin Supreme Court-ah petition thehluh a ni. NPCI chuan October 15 aṭanga ṭan turin MDR hi lak a tum a, Advocate Anjan Datta chuan sorkar hriattirna leh MDR duan thar hi kaltlangpui a nih lohnan court-ah hian petition hi a theh lut.

Petition-ah hian Rs 2,000 hnuaia transaction leh mimal inkara sum inthawn (P2P) te chu a thlawna kaltir reng an phut thu tarlan a ni. Hei bakah thla khata QR code hmanga cheng nuai 1 thleng dawng ṭhin dawr te pawh huam tir an phut bawk. Ruahmanna siamtharah hian Rs 2,000 chung lamah 0.4% lak a ni dawn a, Rs 75,000 chung lamah transaction pakhat zelah cheng 300 aia tam lak a ni lo thung ang.

Petition theh luttu hian Payment and Settlement Systems Act, 2007 Section 10A tarlangin, executive-te hnenah mawhphurhna a pe lian mah mah niin a sawi. RuPay debit card a thlawna hman chhunzawm a nih laia UPI tana charge siam duah a ni chu dik lo hle a ni, a ti.

Hei bakah, thil man bituk leh kalphung tharte hi official gazette-a chhuah loa press release hmanga tihchhuah a ni chu a zia lo hle niin a tarlang. Langtlang leh zau zawka ngaihtuahna seng chung leh, mipui leh sumdawnna tenaute nghawng pawi lo zawnga felfai leh awmze nei zawka bawhzui turin Supreme Court hi a ngen.