Energy security, sumdawnna leh economy hlawkna ngaihtuah a ni ang: MEA

US sorkarin Russia aṭanga crude oil chawk lut ṭhinte chungah chhiah 100% thleng chawitir theihna dan thar pawm a tum mek chungchangah, India External Affairs Ministry (MEA) chuan Ningani khan thuchhuah siamin, India chuan ram chhung mipui tluklehdingawn 1.4-te energy security phuhrukna tur leh ram sumdawnna leh economy hmasawnna humhalh tura hma a lak zui zel tur thu a tarlang.

US Congress-in ‘Sanctioning Russia and Iran Act of 2026’ a pawm chungchangah MEA chuan thuchhuah siamin, India sorkar chuan thil thleng mek hi chik takin a vil reng tih a sawi. India chuan khawvel insumdawn tawnna inher dan a zir zelin ram chhung mamawh energy hi hmun hrang hrang aṭanga chawk luh zui zel tura ruahmanna a siam thu a tarlang bawk.

MEA chuan he thilin ram pahnih inlaichinna leh khawvel energy market-a nghawng a neih dan tur chungchang US thuneitute nen uluk taka chinfel a nih tawh thu a sawi. India sorkar chuan ram chhung sumdawnna leh tualchhung business leh industry pawlte nen thawh hona ṭha tak hnuaiah hma a lak zui zel tur thu a tarlang tel bawk a ni.

US Congress-a bill pawm tak hi president Donald Trump-a hming ziah hnan turin thlen a ni tawh a, he bill hian Russia aṭanga petrol leh gas chawk lut tam ber ram 5-te lakah chhiah 100% thleng lak theihna turin thuneihna a pe dawn a ni. India hi China dawtah Russia aṭanga crude oil chawk lut tam ber a ni mek bawk.