TRAI-in Caller ID app-te spam report pe turin hriattir

India rama telecom regulator lian ber, Telecom Regulatory Authority of India (TRAI) chuan Truecaller leh call management app dangte chu an user-ten spam leh inbumna report an dawn zawng zawng telecom operator-te hnena pe chhawng vek turin thupek thar a chhuah.

TRAI hian commercial communication regulation dante tlawh chhanin, caller ID leh call management app zawng zawngte chu telecom sector-te blockchain platform central system-ah user-te spam complaint data pe lut vek turin a phut a ni. Sorkar thutlukna thar hian phone hmanga scam/inbumna leh tibuai thei commercial call hluar lutuk dona kawngah awmze thui tak a neih chhoh a beisei a ni.

Hemi rual hian TRAI hian Application-to-Person (A2P) call leh robocall hmanga automated system hmante, AI aw hmanga call siam ṭhinte tan dan thar khauh zawk a duang nghal bawk. Company eng pawhin automated system an hmang a nih chuan telecom operator-te hnenah hriattirna kimchang an thlen hmasak a ngai tawh dawn a, hriattirna nei loa call awm zawng zawng chu spam-ah ngaih an ni tawh dawn a ni.