TMC symbol hrensak chungchang tunkarah ngaihtuah tum

Supreme Court chuan Election Commission-in Trinamool Congress party symbol a hrensak chungchanga West Bengal chief minister hlui, Mamata Banerjee petition theh luh chu tun karah ngaihtuah a remti.

Banerjee aiawhtu, senior advocate Kapil Sibal chuan chief justice of India Syria Kant kaihhruai, judge pathum awmna bench-ah Election Commission-in Election Symbols (Reservation and Allotment) Order 1968 hnuaia TMS symbol a hrensak chungchang hi thlenin, hei hi thil awmze nei lo leh ṭha lo tak a ni tih a sawi. "Election Commission hian thil mak tak tak a ti reng mai a ni," a ti.

CJI chuan hemi chungchangah a lehlam ve ve te chu an ṭanchhan sawifiahna hun pek an ni dawn tih sawiin, tunkar chhung ngeia ngaihtuah a tiam.

Trinamool Congress party hi Mamata Banerjee leh Ribabrata Banerjee lam ṭang pawl hniha an phel hnuah, September 17 han Election Commission chuan pawl pahnihte hi an hming leh symbol siamsakin, Trinamool Congress party symbol chu hman theih loh turin a hrensak zui a ni. Mamata pawl lam hi ‘Mamata All India Trinamool Congress’ tih vuahin, party symbol-ah 'football player' siamsak an ni.

Ritabrata pawl lam hi ‘Democratic Trinamool Congress’ tih niin, symbol-ah 'envelope' siamsak an ni bawk. Party buaina chinfel a nih hma chuan TMC hming leh symbol chu pawl pahnihte hian an hman theih loh thu a sawi.

EC thiltih dan chungchanga petition theh luhah, thutlukna a siamnaah party kalphungte a ngaihtuah ṭha tawk lo tih Banerjee chuan a sawi. MLA hel lam thusawi a ngai pawimawh zawk a ni tiin, heng MLA helte hi anti-defection law hnuaiah ban tur an ni tih a sawi bawk. MLA aṭanGa ban an nihna tur tihkhawtlai a nih chungchangah Banerjee lamṭangte hian Supreme Court-ah petition hran an theh lut bawk a ni.

Leader of Opposition Ritabrata kaihhruaiin TMC MLA eng emaw zat chu an hel a, Mamata Banerjee chu party hotu a nihna tihtawpsakin, a thlaktu atan MLA Arup Roy an thlang a ni. Mahse, Banerjee lamṭangte chuan hei hi an thlawp lo a, party hotu lu berah Mamata Banerjee chu an la pawm zui thung. Pawl pahnihte hian TMC ziding zawk nih an inchuh zui a ni.