India leh Sri Lanka Navy-ten 'SLINEX' vawi 13-na nei

India leh Sri Lanka Navy ten inzawmna thuk zawk an neih theih nan leh tuipui lama thawh ho zelna atan nunchan zir hona, ‘SLINEX-26' chu September 17 khan Visakhapatnam-ah ṭan a ni. Nunchan zir hona hi India leh Sri Lanka-ten an neih vawi 13-na a ni a, September 21 thleng a awh a ni.

SLINEX-26 hi India ram Eastern Naval Command hotute kaihhruaina hnuai a neih a ni a. Nunchan zirna hi ṭhuang hniha kalpui niin—Kulh, Harbour Phase leh Sea Phase-a ṭhen a ni. India Navy- te hian ramchhung ngeia siam chhuah, Anti-Submarine indo lawng 'INS Kavaratti' leh fleet tanker 'INS Jyoti' te an hmang. Sri Lanka Navy-in lawng lian 'SLNS Sindurala' te an thawh chhuahpui ve bawk.

Harbour Phase hi INS Kavaratti chhungah lawng thawktute nen ceremonial reception buatsaihin ṭan a ni a,hemi chhung hian Navy hotute inkarah tawnhriat inhrilh tawnnate, insawizawi te, Yoga leh infiamna hrang hrang buatsaih a ni. A thawh hnihna 'Sea Phase' ah tuifinriat vela thawh ho dan tur leh tawnhriat hrang hrang inhrilh tawnnate neih zui a ni.

Kum 2005 aṭangin 'SLINEX' neih ṭhin a ni a, ram pahnih Navy-te inkara hriatthiamna leh thawh hona tiphuisuitu pawimawh tak a lo ni tawh a. India ram 'MAHASAGAR' thil tum nen pawh inmil tak niin, Indian Ocean huamchhunga remna, muanna leh himna a awm reng theih nana thil pawimawh tak a ni tel bawk.