India-in core BRICS market-a bungraw thawn chhuah pung

India-in BRICS dintu ram panga 'Core BRICS'— China, South Africa, Brazil leh Russia-te hnena thil a thawn chhuah zat a pung nasa hle a, kumin April-August inkar chhung khan 34% in a pung hman. Commerce Ministry data-a tarlan danin, kumin financial year chhungin April - August inkar khan India thil thawn chhuah hlut zawng hi USD tld 19.9 a tling pha. Kum hmasa 2025-26 April-August inkar chhung khan USD tld 14.9 a ni thung.

Core BRICS-a India-in a thil thawn chhuah zawng zawng zat hi 8.1% a nih ṭhin laiin, kumin thla nga chhung lekin 9.2%-ah a kai chho a ni. BRICS ram zinga thil thawn chhuak tam ber chu China niin, China thawn chhuah hi 39%-in a pung a, USD tld 9.6 a tling. South Africa chu hmasawn chak ber niin, 58% a pung a, Brazil leh Russia pawh 13% leh 11% velin a pung ve bawk.

Commerce Ministry hotu pakhat sawi danin, India hian BRICS ramte nena sumdawnna a tihngheh bakah BRICS pawl chhunga ram lian zawkte nena thawh hona a nghet zel a ni, a ti. Core BRICS rama India thil thawn chhuah hi BRICS ram dang zawng zawng aiin a let thumin a pung chak zawk a ni.

BRICS ram bakah, Asia leh Europe ram ṭhenkhat hnena India thil thawn chhuah pawh a pung hle. Japan-ah 43% in a pung a, a bikin mineral fuel, electronics leh aluminium thawn chhuah a sang hle. Italy a thawn chhuah punna 30% niin South Korea-ah 22% in pung bawk a ni.