India leh V4 ram foreign minister meeting nei

Central Europe ram pali awmkhawmna 'Visegrad Group' (V4) leh India Foreign Minister-te chu September 21, Thawhṭanni khan United Nations General Assembly (UNGA) vawi 81-na neih karlakah hlawhtling takin an inhmukhawm. Hetiang anga Foreign Minister hrang hrangte meeting neih historic event pawimawh tak a ni tih external affairs minister S. Jaishankar chuan a sawi.

V4 ah hian Central Europe rama sorkar lian – Czech Republic, Hungary, Poland leh Slovakia-te an tel. A vawi khatna atana V4+India format hmanga Foreign Minister meeting neihnaah hian political, economic leh defence huanga thawh hona tihhmasawn zui zel chu ram hrang hrang aiawhte chuan an pawm tlang a ni.

Meeting neih hnua thuchhuah a siamah Jaishankar chuan, "He meeting hi a hlawhtling hle a, V4 leh India inkar indawrna tihhmasawn zel dan tur ruahmanna pawimawh tak tak kan duang a ni," a ti. India leh European Union (EU) te thawh dunna a ngheh chhoh zel bakah, V4 ramte nen kum tin Business Forum pui tham tak buatsaih zui zeuh zeuh tura inremsiamna pawh neih a ni bawk.

Tualchhung leh khawvel huapa inralrinna chungchang, Ukraine indona leh Gulf tualchhung buaina te pawh sawi ho a ni. Sipai training leh defence sector, technology, innovation, space, connectivity leh mipui inpawh tawnna chu hma lak zui zelna turin Poland Deputy PM Radek Sikorski, Hungary PM aiawh Anita Orban, Slovakia FM Juraj Blanar leh Czech FM Petr Macinka te nen inremna fel tak an nei nghal.