Sorkar laipuiin kum 37 a upa Digital Communications Commission a ṭhiat

Sorkar laipui chuan Department of Telecommunications (DoT) hnuaia thutlukna pui ber siamtu, kum 37 chhung hna lo thawk tawh Digital Communications Commission (DCC) chu nimin khan a ṭhiat ta tih a puang. Union Cabinet chuan September 16 khan he commission ṭhiahna hi a lo pawmpui tawh a, Department of Telecommunications chuan September 19 khan Gazette of India-ah a ṭhiahna thuchhuah hi a tichhuak ta a ni.

He body hi kum 1989 April thla khan 'Telecom Commission' tiin din ṭan a ni a, October 2018 khan National Digital Communications Policy hnuaiah 'Digital Communications Commission' tiin a hming thlak a ni. DCC hi India rama telecom sector-a policy pawimawh tak tak leh sum leh pai lama rawtna lian tham te, Telecom Regulatory Authority of India (TRAI) rawtna hrang hrang te thutlukna siamtu langsar ber a ni ṭhin.

Sorkar thuchhuah tarlan danin, DCC-a official hrang hrang te leh DoT hnuaia departmental adviser-te mawhphurhna bakah, commission-a post pawimawh eng emaw zat a awm awl bawk vangin sorkar chuan dinhmun inthuah awma hnathawh hi a ṭul lo niin a hria a ni. Hemi hma zawng khan Rs vbc 500 leh Rs vbc 1,000 inkar project-te chu DCC-in a ngaihtuah ṭhin a, tunah chuan heng sum hmanna liante hi Finance Ministry hnuaia Expenditure Finance Committee-in an endik ve tawh thung dawn a ni.

DCC hian a ṭhutkhawm hnuhnung ber September 3 khan satellite communication (satcom) spectrum chungchang thutlukna pawimawh tak a siam. Satcom operator-te hnena spectrum kum 5 chhung pek chungchang leh a man chungchang a lo tifel tawh a, chu chu Cabinet pawmpui turin thawn a ni tawh bawk.