Demonetisation-in buaina a thlen zawk : Priyanka Gandhi

Congress hruaitu Priyanka Gandhi Vadra chuan nimin khan prime minister Narendra Modi kaihhruai sorkarin pawisa note lian pahnih a ti thih, demonetisation chuan buaina a thlen phah zawk thu a sawi.

Kum 2016 November 8 khan Rs 1,000 leh Rs 500 note tihthih a ni a, kum thum a liam hnu pawhin a ṭha zawngin a nghawng a neih loh avang leh, India economy in tlakchhiat lam a pan zawk avangin, Priyanka Gandhi chuan PM Modi leh a kaihhruai sorkar chu a dem hle.

Nimin khan demonetisation hman a nihna kum thumna chiah a ni a, hemi ni hi kum 2017 aṭang khan Congress party chuan Black Day-ah an puang a ni. West Bengal chief minister Mamata Banerjee pawhin nimin khan demonetisation avang hian India economy in ṭha lam ai chhiat lam a pan thu a sawi ve bawk.

Demonetisation chung­changa prime minister Modi leh a kaih­hruai sorkar thutlukna dik loh avang hian, India mipui maktaduai telin an tawrh phah thu Mamata hian a twitter-ah a sawi. Mamata hian demo­neti­sation hman a nih kum khatna pualin a twitter-ah picture dum a post a ni. 

Hetihlai hian demone­tisation hman a nih avang hian tax petu 42%-a an pun chho phah thu leh firfiak, eirukna leh black money donna vanga demonitisation hi hman a nih thu PM Modi chuan a sawi.