SIR kalpui hi dan kalh a ni, sut leh ngei tur a ni: Former CEC Quraishi

Election Commission of India (ECI)-in electoral ennawnna, Special Intensive Revision (SIR) an neih mek chu dan kalh tlat a nih thu Chief Election Commissioner hlui Dr. S.Y. Quraishi chuan a sawi a, SIR kalpui mek chu sut leh ngei a ni tur a ni, a ti. Nilainia The Hindu Group buatsaih, ‘The Delimitation Debate: The Union and its Units’ lehkhabu tlangzarh inkhawmah Quraishi hian he thu hi a sawi a ni.

CEC hlui Quraishi chuan kum hnih kalta aṭang tawh khan he hmalakna hi thil ṭha lo tak a ni tia a sawi ṭhin thu a tarlang. Election Commission kalphung leh hotute thuchhuah hrang hrang a taka enchhin a nih hnuah, he SIR ruahmanna hi a bul aṭangin dan nen a inthlawp lo hrim hrim a ni tih a lang chiang hle a ni, a ti. Vote thlaktu khua leh tui dik tak neih hi danin a phut a nih rualin, tun hnaia thil kalpui dan chu rinhlelhna chawk chhuaktu a ni tih a tarlang.

He inkhawmah hian CPI(M) MP John Brittas pawhin SIR leh Lok Sabha constituency delimitation chu thil inzawm tlat a ni tiin a sawi ve bawk. Central-a sorkar mek Bharatiya Janata Party (BJP) chuan politic duhsakna chang tur leh thlan tlin an awlsam zawk nana SIR leh delimitation hi duang niin a puh.

Congress party hruaitu Jairam Ramesh pawhin BJP sorkar chuan Parliament session chhunzawm duh loin, Navratri chhungin Delimitation Bill pu lut turin a inpuahchah mek niin a sawi bawk a ni.