India, France leh UAE FM-ten meeting nei

India, France leh United Arab Emirates (UAE) foreign minister-te chuan Thawhlehni khan New York-a United Nations General Assembly (UNGA) session 81-na neih karlakah ministerial meeting an nei. He inkhawmah hian ram pathumte hmalak ho zel dan tur leh West Asia biala thil thleng mek dinhmun chungchangte an sawi ho.

Meeting-ah hian India external affairs minister S. Jaishankar, France foreign minister Jean-Noël Barrot leh UAE deputy prime minister leh foreign minister Sheikh Abdullah bin Zayed Al Nahyan te an tel a ni. Ram pathum hruaitute hian space technology, artificial intelligence (AI), health sciences, energy, leh culture and heritage lamah thawhhona kal mek tih chak dan leh hmasawnna hrang hrang thlirletna an nei nghal bawk.

Jaishankar chuan meeting zawhah X-ah thuchhuah siamin, "India, France leh UAE-te hian AI, space, energy leh culture lama lungrual zawka hnathawh hona tur broad-based platform ṭha tak kan nei a, ram pathum ṭangrual hian hmasawn leh zual nan chak taka inremsiamna thara thawh ho zel kan tum a ni," a ti.

Ministry of External Affairs (MEA) thuchhuah pawhin ram pathum hruaitute hian West Asia boruak, ngaihtuahawm taka awm mek chungchang ngunthluk takin an sawi ho a, remna leh muanna a awm theih nan inringtawk taka thawh hona tihlen zel an remti tih an tarlang bawk.