Mi 2,000 chuangin SIR titawp lailawk tura ngenna thawn

Election Commission of India (ECI)-in eletoral roll ennawnna, Special Intensive Revision (SIR) a kalpui mekah thil fel lo leh dan kalh tam tak a thleng a ni tiin ram chhunga mipui, ukil, mithiam leh eizawnna hrang hrang huanga thawktu mi 2,000 chuang chuan Supreme Court Chief Justice of India (CJI) Surya Kant hnenah lehkha thawnin, thil thlengah hian suo motu nei turin an ngen.

Heng mi hrang hrangte hian SIR kalpui mek hi titawp lailawk, 'stay' rih turin an duh a; ECI leh a thiltih hrang hrang, a bik takin voter registration software ECINet chungchangah Supreme Court-in a din tur mithiamte kaltlanga an chhui zauna leh bihchianna neih an phut a ni. Administrative officer-te duh dana voter mi vaibelchhia 13 aia tam paih takte leh hmun hrang hranga awmte pawh an nihna dik tak ennawn turin an ngen bawk.

Lehkhathawnah hian Election Commission-a CEC Gyanesh Kumar-a'n commissioner dangte remtihna la hmasa loa mahni thua ECI hmunpui aṭanga ECINet thil a tidanglam ṭhin chu Commission multi-member nihna nen a inpersan takzet a ni tiin an sawisel bawk. Election Commissioner pahnih Sukhbir Singh Sandhu leh Vivek Joshi-te pawhin thla 10 chhungin mi 14 aia tam aṭangin objection an dawn thu investigative report aṭangin hmuhchhuah a ni chu pawi an tih thu an tarlang.

Lehkhathawn thawntute zingah hian Admiral (Retd) Vishnu Bhagwat, Prashant Bhushan, Jayati Ghosh, Jawhar Sircar leh mi pawimawh hrang hrang an tel. Indian Constitution-in a phut angin zalen tak leh thianghlim taka inthlan a awm theih nan Supreme Court hmalakna hi a hun takah a thleng tur a ni tiin, lehkha thawntute hian an phut tel a ni.