SC-in MDR Rs 2,000 chin a lak 'Stay' tura ngenna hnawl

Sorkar laipuiin UPI hmanga Rs. 2,000 chunglam inthawna Merchant Discount Rate (MDR) lak a tum dang rih tura ngenna, PIL theh luh chu Supreme Court chuan a hnawl.Hemi rual hian sorkar laipui chu MDR 0.4% lakna turah affidavit kimchang tichhuak turin a phut a ni.

Chief justice of India Surya Kant, Justice Joymalya Bagchi leh Vipul M Pancholi ṭhutna bench chuan sorkar thutlukna tharah hian interim stay pekna chhan tur ṭha tawk a awm lo tih sawiin, he chhiah lakna thar kalpuina hi titawp rih lo mah se, sorkar laipui, Reserve Bank of India (RBI) leh National Payments Corporation of India (NPCI) te chu kar hnih chhungin ziakin report kimchang pe turin a hriattir.

PIL theh lutute hian UPI-a chhiah thar lak a nih chuan mipuiin digital transaction te an hman ṭhin titlemin, black money leh sum dik lo hmanna a tipung zawk thei dawn niin an tarlang. Hetih laiin defending lam aiawh Additional Solicitor general N Venkataraman erawh chuan October 15 aṭanga hman tur a nih thu leh UPI hmangtu 96% te a huam loh tur thu a tarlang.

MDR lakna tur siam thar hi October 15, 2026 aṭanga hman ṭan tura ruahman a ni a, person-to-person (P2P) te leh thil leina dawr tam zawka transaction pangngaite erawh he chhiah thar lakna tur hian a nghawng buai pha dawn lo thung a ni.