Jantar Mantar-a nawrh huaihawt zinga mi 500 chuang man

Delhi police-te chuan nimin khan Jantar Mantar-a chief election commissioner Gyanesh Kumar laka lungawi lohna lantira nawrh huaihawt zinga mi 500 chuang an hreng. An zingah hian Aam Aadmi Party (AAP) hruaitu Saurabh Bharadwaj, Sanjeev Jha, Atishi leh Sanjay Singh bakah student activist eng emaw zat an tel.

Special Intensive Revision (SIR) kalpuinaa thil fel tawk lo tam tak awm chungchangah, CEC Kumar chu bang turin political party hrang hrang leh zirlai pawlten an phut a ni. Tun hnaiah SIR kalpui a nih danah, Election Commmissioner pahnihte chuan vawi tam tak an dodal chungin CEC hian ama duh anga kalpuiin thutlukna a siam tih an sawi a, hei vang hian CEC demna leh sawiselna a nasa hle.

Nawrh hi All India Students' Association (AISA), Rajya Sabha MP Manoj Jha leh Supreme Court lawyer Prashant Bhushan-te huaihawta neih niin, nawrh a nih dawn vang hian Jantar Mantar leh a chhehvelah venhimna pawh khauh taka kalpui a ni a, police-te bakah Rapid Action Force (RAF)te pawh dah an ni. A bulhnaia metro station gate hrang hrang pawh khar a ni bawk. Moble internet service pawh tihtawp a ni bawk. Police-te chuan Jantar Mantar-a punkhawm phalna pek a ni lo tih an sawi.

Nimin vek khan Mumbai-a Shivaji Park-ah Corkroach Janta Party (CJP) huaihawtin CEC bang tura phutna 'Jail Bharo' protest neih a ni bawk. Pungkhawm zinga eng emaw zat chu police-ten an man.