Rahul Gandhi-a'n 'Satyagraha' digital platform tlangzarh

Chief Election Commissioner (CEC) Gyanesh Kumar ban phuta eptu party hrang hrang, tlawmngai pawl leh zirlai pawlte nawrh an huaihawt mek karah, Lok Sabha-a Opposition Leader Rahul Gandhi chuan ram chhung hmun hrang hranga lungawi lohna leh duh lohna lantirna thleng mekte hriat chian leh zawn khawm a nih theih nan 'Satyagraha' digital platform a tlangzarh.

X-a a thuchhuah siamah, Rahul Gandhi chuan "Ram pumah zirlai, kuthnathawk, Adivasi, Dalit leh hmeichhiaten awmze nei takin thawm an chhuah mek a, mahse, mahni chauha bei anga inhriatnaa awm. Tunah chuan khawvel hmaah Bapu in min zirtir thudik leh dikna kaltlanga hnam hmasawnna kan duhna kan lantir dawn a ni," a ti. Platform-ah hian hawn a ṭanga darkar 9 chhungin mipuiin an harsatna leh lungawi lohna an thlen 10,000 aia tam a lut hman tih a sawi.

Congress president Mallikarjun Kharge chuan Kalaburagi, Karnataka-ah thil thleng tarlangin, "Tun hnaia vote thlak dan leh SIR kalpui danah rin tawkna a awm tawh lo. Ram pum huap inthlan hi dik lo taka neih a ni a, Lok Sabha leh State Assembly hrang hrang te ṭhiah a, paper ballot bawk hmang leh turin sorkar kan phut a ni," a ti. Narendra Modi sorkar chu dik lo taka thuneihna hum zui mekah a puh bawk.

Hemi hma hian Patel Chowk a ṭanga Jantar Mantar pana lungawi lohna lantirtu mi 150 zet chu Delhi Police-te chuan lo dangin, AISA President Neha Bora, activist Yogendra Yadav leh advocate Prashant Bhushan te telin mi ṭhahnem tak an man zui a ni. Eptute hian inthlanpui leh SIR system-a fel lohna awm te a tak taka siam ṭha turin sorkar laipui an nawr zui reng a ni.