SC-in Ayodhya thubuai a ching fel

Hun rei tak buaipui tawh, Uttar Pradesh-a Ayodhya rama Hindu leh Muslim te ram inchuh thubuai chu kar kal ta Inrinni khan Supreme Court chuan a rel fel ta. 

Chief Justice of India Ranjan Gogoi kaihhruai judge panga awmna, Supreme Court bench chuan Ayodhya thubuai hi hun rei tak a ngaihtuah hnuah thutawp a siam ta a ni. Bench-ah hian CJI bakah justice SA Bobde, DY Chandrachud, Ashok Bhu­shan leh S Abdul Nazeer-te an awm. 

Supreme Court chuan Hindu leh Muslim-te ram inchuh, kum 1992-a Muslim moque tihchhiat tak awmna hmun, ram acre 2.77-a zau chu Hindu Lord Ram temple sakna atan a pe a, hemi rual hian Ayodhya-ah mosque sakna tur ram acre 5-a zau chu Sunni Waqf Board hnena pe turin sorkar laipui a hriattir nghal bawk. 

Ayodhya-a Ram temple sakna tur hian thla thum chhung ngeiin trust din turin Supreme Court chuan a ti bawk a, anni hian temple sak hna hi an bawhzui dawn a ni. 

Ayodhya rama Babri Masjid awmna hmun chu Hindu hoin an pathian, Ram pianna hmun niin an chhal a, hei vang hian kum 1992, December 6 khan India ram hmun hrang hrang aṭanga Hindu kulmuk ho kalkhawm chuan kum zabi 16 hunlaia sak, Babri Maasjid hi an vaw­chhia a ni. Hindu leh Muslim inkar­ah buaina nasa tak chhuak zuiin, mi tam takin an thih phah bawk. 

Muslim-te chuan an mosque tihchhiatsak an nih chungchang hi court-ah an khing a, kum 2010 khan  Allahahad High Court chuan an ram inchuh hi hmun thumah ṭhenin, Hindu leh Muslim te bakah Nirmoha Khara te tan inzatin a sem a ni. Mahse High court thutlukna siam danah hian an vai hian an lungawi lo a, Supreme Court-ah an thlen leh. Supreme Court chuan an thubuai hi hun rei tak a ngaihtuah hnuah, thutlukna hi a siam ta a ni. 

Ayodhya thubuaia Supreme Court thutlukna siam avang hian buaina lian tham chhuak a awm lo nia hriat a ni. Ayodhya-a Circle Officer Amar Singh chuan Muslim leh Hindu te chuan court thutlukna hi an pawm thiam a, lungawi loa buaina siam an awm lo niin a sawi. 

Venhimna erawh khauh taka kalpui a ni thung a, nimin thleng khan Ayodhya leh a chhehvelah sipai ṭhahnem tham duty chhunzawm tir an ni a, buaina chhuak venthawn thilah IPC section 144 pawh  hman a la ni bawk. Hetih lai hian social media lamah erawh court thutlukna sawisel leh, buaina chawk tho thei zawnga thu post eng emaw zat a awm. Heng  thu post-te avang hian mi 37 lakah thubuai ziahluh a ni tawh bawk Police-te chuan social media-a thu post 3,712 chu paih tir an ni tawh tih an sawi.