Kartarpur hawnin India leh Pak inkar nasa takin siamṭha dawn : Manmohan Singh

Prime minister hlui Manmo­han Singh chuan Kartarpur corridor hawn chuan India leh Pakistan inkar nasa takin a siamṭha dawn tih Inrinni liam ta khan a sawi. Manmohan Singh hian Inrinni khan  Kartarpur hi a thleng a, India khualzin helai hmun thleng hmasa ber zingah hian a tel. He corridor kaltlanga Pakistan rama lut India mi Sikh khualzinte chu lo lawm zuiin, khualzinte hian Pakistan-a Gurudwara Darbar Sahib, Guru Nanak Dev-a chawlna hmun tawp ber nia sawi chu an pan zui a ni.

PM hlui rual hian Akal Takht Jathedar Harpreet Singh, Punjab chief minister Amarinder Singh, Punjab chief minister hlui Parkash Singh Badal, cricketer hlui politician nizuita Navjot Singh Sidhu leh BJP MP Sunny Deol-te pawh an kal a, anni bakah hian mi pawi­mawh eng emaw zat an tel.

Kartarpur corridor kal hmasa ber 500-te chu prime minister Narendra Modi-a'n a vai liam a, he corridor leh  integrated check post hawnte chuan mipuite hnenah hlimna nasa tak a thlen dawn tih a sawi. Pakistan prime minister Imran Khan chuan Inrinni kha he corridor hi official-in a hawng a, India leh Pakistan hian khualzin 5000 helai hmun kaltlang tir hi an remti a ni. Mahse khualzinte hi ni tlak hma ngeiin India rama an let leh a ngai thung.

November 12 hi Sikhism hmuchhuaktu Guru Nanak Dev piancham kum 550-na a ni tawh dawn a, hemi pual hian ram lehlam lehlamah hian event hrang hrang buatsaih a ni bawk. Guru Nanak Dev hian Kartarpur Sahib-ah hian a hun hnuhnung kum 18 chhung zet chu a hmang  a, helai hmun hi khawvela Sikh Gurudawara lian berah siam a ni zui a ni.