Cyclone Bulbul vangin Modi leh Mamata inbia

Thlipui na tak, Cyclone Bulbul chuan India hmar­chhak a nuai a, hemi chung­changah hian prime minister Narendra Modi leh West Bengal chief minister Mama­ta Banerjee-te chu inbiain, chhiatna thleng thei tur laka invendan tur an sawi.

"Cyclone Bulbul chung­chang­ah hian Mamata nen kan inbe tawh a, sorkar laipui lam aṭanga ṭanpui na tur chu kan inpeih thu ka sawipui a ni. Tute pawh he cyclone laka an him theih nan ka ṭangṭai sak reng bawk," tiin PM Modi chuan a twitter-ah a ziak. 

Bulbul tlehna lai hi West Bengal hmar lama awm Sundarban National Park hmarchhak lam tuipui, kilometre 120-a hla a nih thu Meteorological Department (IMD) chuan a tarlang. Bangladesh tuipui kam leh West Bengal-a north 24 Parganas district leh Nadiya district chu thli hian a nuai thu IMD chuan a tarlang a, he thlipuiin chhiatna a thlenah mi pali in nunna an chan tawh thu thuneitute chuan an sawi bawk. Bulbul hian kar kal ta Inrinni zan dar  8.30  khan Sagar Island hmar lam a nuai thu leh Kolkata aṭanga chhim lam km 100 chin a nuai tawh thu tarlan a ni.