PM-in thiamna tipung tur leh technology thar mila insiamrem turin chah

Prime minister Narendra Modi chuan WorldSkills Competition, Shanghai-a neih meka India aiawha telte chu Zirtawpni liam ta khan kawmin, an thiamnate tipung a, technology thar ṭhang mek mila an theihna neihte tihmasawn turin a chah. Ṭhalaite theihna mila thawhpui sorkarin a mamawh thu sawiin, sorkar leh institution-te kaltlangin India chu khawvel huap mihring thiamna nei tamnaa siam an tum thu a sawi.

Inkawmnaah hian thiam bik thil neih chu a pawimawh thu sawiin, ṭhalai la naupang zawkte chu thiamna ṭhang chho zel mila insiam rem turte, khawvel market-in a mamawh ang mila thiamna tihhmasawnte chu a pawimawh thu a sawi. Ramchhunga skill training tihhmasawnna tura tha thawh ve tura a ngen thu official thuchhuah chuan a tarlang.

WorldSkills neih mek hi khawvel huapa skill hmanga in elna lian ber a ni a, he program kaltlang hian ram hrang hranga ṭhalai thiam bik thil nei ṭha tak takte chuan vocational leh technical skills-te hmangin an theihnate an pholang ṭhin. India aiawhte hian PM nena an inkawmnaah hian inelna huanga an tawnhriat neihte hrilh hriatna hun an hmang ngal a, hmanraw thar leh software thar mila insiamrem theih pawimawhna te an sawi ho nghal a ni.