INDIA bloc-in vawiinah 'Vote chori' chungchangah kawng zawh leh tum

Electoral roll ennawnna kalpui a nih dan felhlel awm nia rinhlelh avanga Chief Election Commissioner Gyanesh Kumar a hna aṭanga ban phutna kal zelah, eptu pawl intel khawm INDIA bloc chuan vawiin hian Delhi-ah kawng zawh chhunzawm an tum. He mi rual hian Chief Justice of India-in he thil thlenga hmalakna a neih phutin pawl aiawhte chu memorandum an theh lut nghal bawk ang.

Kawngzawhna kalpui leh tum hi Cockroach Janta Party(CJP) bultuma Inrinni liam taa nawrh huaihawta pungkhawm zinga mi eng emaw zat hren an nih thu hriat hnuah puan a ni a, Trinamool Congress hruaitu Mamata Banerjee pawh hren zingah hian telin vawiina kawng zawh huaihawt leh tum pawh hi tel leh ngei a tum thu a sawi. Kawng zawh tur thu puan a nih hnu hian Congress general secretary (organisation) K C Venugopal chuan India democracy humhimna turin mipui tam zawk chu tel turin a sawm nghal a ni.

INDIA bloc lamin president Droupadi Murmu hnena memorandum an theh luhah CEC Kumar chu bang tura phut bakah, inthlana vote thlakna atan Electronic Voting Machine(EVM) hmang tawh loa paper ballot hman leh an phut bawk. Hei bakah CEC leh election commissioner-te an hna chelh chhunga thubuai siamsak theih loha humhimna pekna chu ennawn turin an phut bawk. Ram chhunga Special Intensive revision(SIR) kalpui mek titawp tur leh list aṭanga voter vaibelchhe 13.30 paih takte dah let leh turin an phut tel bawk.

Kar liam ta Thawhlehni khan eptu pawlte hian CEC ban phutin Parliament aṭangin Election Commission office panin kawng an lo zawh tawh a, mahse kawng lakah police-ten an dang a ni. Nilaini leh Ningani khan eptu MP-te chuan Jantar Mantar leh Rajghat-ah lungawi lohna an lantir tawh bawk a ni.