Buainaah Supreme Court hnuk lut suh u: CJI

Chief Justice of India Surya Kant chuan nimin Thawhṭanni khan ramchhung inrelbawlna leh politics thila ralmuang taka nawrh leh lungawi lohna lantir chu thil tih ngei tur a nih thu sawiin, hemi rual hian heng buainaa Supeme Court inrawlh tir tum loh tur a nih thu a sawi. Eptu pawl intelkhawm INDIA bloc-in chief election commissioner (CEC) Gyanesh Kumar a hna aṭanga bang tura nawrna atan Supreme Court pana kawng zawh an tum vanga sawi chhuak a ni.

INDIA bloc-in Supreme Court pana kawng zawh an tum vang hian court lamah pawh venhimna khauh tak dah a nih phah a, CJI Kant chuan lungawi lohna awmte avanga SC hna thawh tluang taka kal tur tihbuai a rem loh thu sawiin, "Political party buainaah hian kan mawhphurhna a awm lo" a ti. Leader of Opposition Rahul Gandhi chu lehkha thawnin nimina hmuh an tumna chu a hnawl thu hi Pathianni liam ta khan a lo hrilh tawh bawk.

CJI Kant chuan court chu lungawi lohna lantirna hmun atana rem a tih loh thu tarlangin, "Tunah rih chuang engmah ka sawi thei lo a; mahse, ka ngen duh che u chu Bar member zawng zawng hian nawrh huaihawtna leh khawi hmunah pawh tel theihna dikna an nei a ni" tiin, Inrinni liam taa pungkhawmte mannaa journalist leh lawyer eng emaw zat an tel chungchang chu a sawi bawk a ni.