Congress-in SIR kalpui hnuah lutru hmuh chhuah leh thawnkir zat zawt

Eptu party Congress chuan union home miniser Amit Shah chu eptu pawlte bultuma vote rukbo, 'vore chori' duh lohna lantirna a sawisel hnuah, electoral roll ennawnna Special Intensive Revision (SIR) kalpui a nih hnua roll aṭanga paihte ramchhunga lut ru ngei tih finfiah an nei tawh em tih an zawt.

Congress party chuan SIR kalpui a nih hnuah dan loa ram chhunga lut ru (ghuspaithiye) finfiah zat, roll atangin lut ru eng zat ngei paih tih leh an rama thawn kir tawh zat chu Amit Shah hi an zawt a ni.

Party general secretary in-charge communication Jairam Ramesh chuan X-ah dan loa ram chhunga lutru chungchang inhnialna chu buaina dik tak zawk, mipuiten vote thlak tura zalenna an neih hlihsak avanga buaina awm mek thup mawi tumna mai a nih thu a tarlang. SIR chu Shah-a'n roll aṭanga paih tura a nawrna anga kalpui, 'Shah Instigated Removal' tiin a sawisel. Prime Minister leh Home Minister-te chuan roll aṭangin mi vbc 14 an paih a ni, a ti. Ram mi leh sa vbc 100 an endikna result chu mipuiten hriat ve ngei an phu tih a sawiin, roll aṭanga paih vbc 14-te chu ram dang aṭanga lut ru tak tak an nih chuan Shah-a Home Minister-na hnuaia lut ru hi an pung hluai zawk niin a sawi bawk.

Amit Shah hian Thawhlehni khan chief election commissioner Gyanesh Kumar leh SIR kalpui dan chungchanga eptu pawlte nawrh huaihawt chu sawiselin, Congress chuan kum 2029 inthlanpui lo awm turah a zawna term li an chak lohna tur an hmachhawn leh dawn a ni, a ti. Hei bakah Leader of Opposition ruahmannain ram chhunga lut rute chu voter anga ziah luh tum a ni tiin a puh bawk.