Maha Governor-in sorkar siam turin Shiv Sena sawm

Maharashtra assembly inthlan­ah  Bharatiya Janata Party (BJP) leh Shiv Sena thawkdun chu thlan tlin ni mah se, party pahnihte hi ṭangrual sorkar thar siam tura thuneihna insem dan turah an inrem theih loh avangin tun thleng­in sorkar thar a la ding thei lo. 

Assembly inthlanah hian BJP chuan seat 105 lain, Shiv Sena hia seat 56 a la bawk. Assembly seat 288 awmnaah hian sorkar siam turin member 145 neih phak a ngai a ni.  Shiv Sena hian sorkar thar an siam turah chanpual inzat, 50:50 a insem a phut a, hei hi BJP lamin an pawmpui thei lo a ni. Kum 25 chuang zet lo thawk dun tawh, BJP leh Shiv Sena te hi inkar boruak hi a ṭha lo chho hle. 

Party pahnihte hi  inrem dan kawng zawngin hun rei tak an inbia a, mahse an inrem thei lo a ni. BJP in governor Bhagat Singh Koshyari hnenah sorkar siam an tum lo tih an hrilh hnuah, Pathianni khan governor chuan Shiv Sena chu sorkar siam turin a sawm. 

Governor-in a sawm hnuah Shiv Sena chuan ṭangrual sorkar siam dan tur a ngaihtuah nghal. Nimin khan Sena hotu Uddhav Thackeray chuan National Cong­ress Party (NCP) hotu Sharad Pawar chu Mumbai-ah inbiakna a neihpui a ni. Mahse meeting an neih hma hian Pawar chuan an party thawhpui, Congress nena an sawidun hnuah thutlukna a siam chauh tur thu a sawi. NCP hian MLA 54 a nei a, Congress-in 44 a nei bawk. Shiv Sena hian NCP nen chauh ṭangrual sorkar a siam thei dawn lo a, hei vang hian Congress thlawpna pawh hi a neih tel a ngai dawn a ni. 

Congress interim chief, Sonia Gandhi chuan Shiv Sena hi an thlawp dawn lo tih a hmain a lo sawi tawh a, mahse Maharashtra-a an party hruaituten an nawr mek avang leh, BJP tellohna sorkar din a nih theih nan an thutlukna lo siam tawh hi an sut mai rin a ni. Party thuneitu sang, Congress Working Committee chuan Sena kaihhruai ṭangrualah hian tel kher loa, pawn lam aṭanga thlawp chungchang chu nimin khan an ngaihtuah nghal bawk. 

NDA sorkara Shiv Sena minister awmchhun bang Shiv Sena MP Arvind Sawant  chuan nimin khan Narendra Modi cabinet-a Union Minister for Heavy Industries and Public Enterprises a nihna chu a bansan tih a sawi. Maharashtra-a Bharatiya Janata Party (BJP) leh Shiv Sena-ten sorkar siamna kawnga inremna an siam theih loh avangin Arvind Sawant  hi a bang a ni. Sena hruaitu hian BJP chu inthlan hmaa an thutiam, Chief Minister in nih chhawk a, 50-50 formula hman an tiam chu bawhchhiaah a puh zui bawk.

"BJP hian inthlan hmaa an thutiam an bawhchhia a ni. Sorkar laipuia awm reng hi dikin ka hre thei lo, chuvang chuan Union Minister ka nihna aṭang hian ka bang ta a ni," tiin a sawi. BJP hi a dem hle a, Union cabinet-ah pawh a banna hi a thlen tawh a, twitter lamah pawh 50-50 formula hmang tura inremna an lo siam vek tawh an bawhchhe leh si chu a dem thu a tweet zui a ni. Shiv Sena chu an dik zawk hle tih sawi bawkin, thil dik lo tak tichunga Delhi a awm reng chu a ṭulna a hriat loh thu leh chu chu a ban chhan pawh a nih tih a sawi bawk.