Chief election commissioner hlui TN Seshan a thi

Chief election commissioner hlui TN Seshan chu Pathianni khan a chenna in Chennai-ah a thi.

TN Seshan hi  1990 Decem­ber 12 aṭanga 1996 December 11 thleng chief election commi­ssioner a ni a, chief election commissioner 10-na a ni. "Civil servant lo ni tawhte zinga mi hmingṭha a ni a, kan ram tan hian a rinawm hle a ni. Kan ramah democracy tundin a nih theih nan a thawh hlawk em em bawk," tiin prime minister Narendra Modi chuan Seshan a ui thu a sawi. 

Chief election commissioner hlui SY Quraishi pawhin, "Seshan hi kan ram rohlute zinga mi a ni a, a thlarau chawlh hahdam nan ka ṭawngṭai sak a ni," tiin a uina thu a sawi ve bawk. Anni bakah hian a hnathawhpui ṭhinte leh India mi pawimawh hrang hrangte'n Seshan uina thu an sawi bawk a ni. 

Seshan hi 1955 batch Indian Administrative Service (IAS) officer a ni a, Tamil Nadu cadre pek a ni. Kum 1932 December 15 khan British hunlaia Tirunellai Narayana Iyer Seshan (Kerela)-ah a lo piang a, November 10 khan kum 86 mi niin Tamil Nadu-a Chennai khuaa a chenna inah a boral.