JNU zirlaite'n lungawi lohna lantir

Delhi-a Jawaharlal Nehru Students’ Union (JNUSU) chuan nimin khan  'Anti-student' Policy duh loh avangin, an campus aṭanga kawng zawhin 'third convocation' hmanna hmun, All India Council for Technical Education (AICTE) auditorium-ah luh tumin lungawi lohna an lantir.

JNU zirlaite lungawi lohna chhan ber chu Draft Hostel Manual an duh loh vang a ni a, he draft-ah hian fee tihsan chungchangte, hostel hawn leh khar hun (time) leh thawmhnaw hak dan tur chungchanga inthu­nunnate ziah lan a nih vangin zirlaite hi an lungawi lo a ni.

Nimin khan AICTE auditorium-ah hian 'third convocation' hmanna inkhawm neih a ni a, hetah hian khuallian atan Vice President Ven­kaiah Naidu chu sawm a ni. JNU aṭanga auditorium hi km 3 vela hlaa awm a ni a, convocation hmanna hi zirlaite chuan luhchhuah tumin an kal a, police-te chuan gate-ah an lo dang. Zirlaite leh police-te in nawr naah hian zirlai ṭhenkhatte pawh man a nih thu tarlan a ni.

Draft Hostel Manual an duh loh thu an sawi bakah,  JNU campus chhunga zirlai tam takte fuankhawm fona hmun nuam tak, 'Parathasarathy Rocks' chu thuneitu lam chuan duh duha zirlaite luh theih loh tura khapsak an tum a, 'student union office' pawh khar sak an tum tih zirlai kalkhawmte chuan an sawi bawk.

An thil ngiat hi tihhlawhtlin sak ngei tura phutin, tihhlawhtlin a nih hma chuan zirlaite chuan nawrh an huaihawt chhunzawm zel dawn thu an sawi.