MHA leh Ladakh aiawhte inbiakna hlawhtling lo

Ministry of Home Affairs (MHA) aiawh leh Ladakh-a Leh hruaitute chu Ningani khan Leh Secretariat-ah India danpui hmanga Ladakh humhimna siam leh state puitlinga dah phut chungchangah inbiakna an nei leh a; mahse, inremna siam thei loin inbiakna an titawp. October 22-ah New Delhi-ah inbiakna hi neih chhunzawm leh a ni ang.

October 15-a inbiakna neihah hian Leh-a Leh Apex Body (LAB) leh Kargil Democratic Alliance (KDA) pawl aiawhte leh MHA aiawhte telin, rawtna neihte sawi ho a ni a, mahse, an la inrem thei lo. Ladakh-a pawl pahnihte hian state puiltinga Ladakh hlankai a nihna tur hian hmalakna hrang hrang an lo kalpui tawh ṭhin a ni.

Inbiakna hi darkar li chhung awh niin, Article 371(K) hnuaia Ladakh humhimna pek leh Union-Territory level elected body pekna tur rawtna an siam tharte ngaituah ho a ni. LAB co-chairman Chering Dorjay chuan MHA rawtna siam leh Ladakh aiawh rawtna siamte en ho a nih thu sawiin, pawl pahnih aṭanga rawtna thlenah inrem theih lohna lai a a la awm tih a sawi. Inbiaknaah hian climate activist Sonam Wangchuk pawh a tel.

Nimin Zirtawpni khan Ladakh Lieutenant Governor V K saxena chuan Ladakh-a district thar siamna tur a puang a, Ladakh-ah district pariat a awm thei dawn a ni. District thar tura puan hi Sankoo district niin, prime minister Narendra Modi-an hmasawnna tur project panga thawhna tur a puan hnuah district thar siam tur hi puan a ni zui ve leh ta a ni. Saxena hian kumin April khan district thar panga Nubra, Sham, Changthang, Zanskar leh Drass siamna tur hi a lo puang tawh bawk a ni.