Internet hman nasat-in naupang taksa leh rilru nghawng pawi thei: ICSSR

Indian Council for Social Science Research (ICSSR)-in zirlai naupangten internet an hman dan chungchang zirchianna a neihah, naupangah an taksa leh rilru ṭhanna a nghawng thei tih a an hmu chhuak. He mi avang hian ICSSR chuan internet leh a kaihhnawihte chu zirtirtu leh nu leh pate enpuina hnuaia khawih ṭhin a ṭul thu an tarlang bawk.

ICSSR-in a zirchiannaah hian naupang, internet thil lam khawih nasaah chuan anxiety, mut ṭhat lohna leh mood inthlak danglam chu harsatna thleng tlanglawn a ni. Hei hian internet khawihin naupang-teah taksa leh rilru lamah nghawng ṭha lo a nei tih an nemnghet a, technology ṭhang chho zel kara seilian naupangte tan thawh hona ṭha zawk leh mumal zawk hmanga naupangte tihhmasawnna tura ṭanrual a ṭul hle tih an sawi.

Report-in a tarlan danin, a nawlpuiah hmeichhia aiin mipain internet hi an hmang nasa zawk. Hei hian an tan thil ṭha lo khawih leh hmuh theihna kawngah nasa takin hmeichhia aiin kawng a hawng awlsam zawk tih an sawi. Hetih laiin hmeichhiaah erawh khuahkhirh lutuk avanga hnufual bikna an neih a hlauhawm niin an tarlang bawk.

Naupang zirchian aṭanga 47% chuan tun hnai thla ruk liam ta chhung khan hmelhriat loh betu an nei a, heihi online games an khelh aṭanga an tawnte a ni. Hmelhriat loh aṭanga betu nei hi naupang kum 12-13 ah a tam zual a, cyber bullying tawkte pawh an awm. Naupang tam zawk chuan chhungte emaw zirtirtute emaw hnena an harsatna hrilh hriat chu nuam an ti lo niin report chuan a tarlang.