US Secretary of State Marco Rubio-in India rawn tlawh

India leh US insumdawn tawnna tura inremna hmawr bawk a hnaih tawh avangin, US secretary of state Marco Rubio chuan nimin khan ni hnih cham turin India a rawn thleng. Rubio hi a nupui, Jeanette Rubio leh India-a US ambassor Sergio Gor ten an ṭawiawm.

Rubio hi Mumbai-ah rawn ṭumin, foreign minister S Jaishankar nen meeting an nei nghal a, Taj memorial-ah 26/11-a Mumbai-a firfiakte pawikhawihna thlen tuartute hriatrengna pangpar dahin US independence kum 250 champha lawmna hun, 'Freedom 250' tih chu a hmanpui bawk. Maharashtra chief minister Devendra Fadnavis pawh a hmu bawk a ni. Vawiin lamah Gujarat-a energy hub, Jamnagar ami a tlawh ang.

Thawhṭanni khan Rubio chuan India leh US trade deal chu zawhfel a nih ṭep tawh thu sawiin, India chu US thawhpui pawimawh tak a nih thute, chhiah emaw hrekna emaw in siam hmain energy mamawh phurukna tur lam tihfel hmasak a pawimawh thu a tarlang a ni.

Nimin tlaia Rubio leh Jaishankar-te inkawmnaah hian energy, trade, investment, defence, criticial technology leh kawng hrang hranga ram pahnihte thawh dunna chungchangte an sawi dun a ni. Rubio hian kuminah official-a India a tlawh vawi hnihna niin, May thla khan a rawn zin tawh bawk. A cham chhung hian sorkar mi pawimawhte bakah, sumdawnna lama hotute pawh hmuin, commercial investment chungchangte a sawipui dawn tih US State Department chuan a tarlang.