Sorkar laipui leh Ladkh aiawh inbiakna turah LAB leh KDA sawm lo

Sorkar laipui aiawh leh Ladkh pawl aiawh Leh Apex Body (LAB) leh Kargil Democratic Alliance(KDA) sub-committee level inbiakna, nimina neih tura tihah LAB leh KDA chuan Ministry of Home Affairs lam aṭangin sawmna an dawn loh thu LAB co chairman Chering Dorjey chuan thuthar thehdarhtute a hrilh.

Ladakh aiawh pawl pahnih, LAB leh KDA-te hian India danpui hmanga Ladakh humhim a nihna tur leh Union Territory anga elected body din an phut a, October 15 khan MHA aiawhte nen hian an inbe tawh a ni. Hemi ṭum hian inremna an siam theih loh avangin nimin, October 22 ah inbiakna neih chhunzawm leh turin an ruahman a ni. Mahse,hemi atana sawmna hi LAB leh KDA hruaitute hian an dawn loh avangin inbiakna hi neih a nih loh thu Dorjey chuan tarlang.

October 15-a inbiakna an neihah khan MHA hian LAB leh KDA hruaitute hnenah an ruahmanna siam phek 33 a chhah chu hlanin Ladakh aiawh pawlte hian an rawtna siamte chu an theh lut ve bawk. Ladakh pawl aiawh lam hian MHA chuan an ruahmanna lo siam tawh leh intiam angte an puitlin leh thei lo niin an sawi.

Ladakh lam hian MHA-in Ladakh Autonomous Hill Development Council (LAHDC) Act a siamrem chuan lieutenant governor thuneihna zau zawk a pek bakah council thuneihna turte a tihniam zawk niin an tarlang. Dorjey chuan Ladakh hnena UT level elected body pek a nih hma chu an lungawi mai loh tur thu sawiin, UT level rorelna nei chung pawhin thuneihna lian tham tak tak an neih phak loh thute a tarlang tel bawk.