BJP-in rampum huap outreach campaign kalpui

Congress party kaihhruaia eptuten Special Intensive Revision (SIR) kalpui a nih dan leh Chief Election Commissioner (CEC) chungchanga sorkar laipui bei a, lungawi lohna an lantir mek karah, rorellai Bharatiya Janata Party(BJP) ṭhalai pawl, Bharatiya Janata Yuva Morcha (BJYM) chuan nimin aṭang khan rampum huap youth outreach campaign an huaihawt. Hei hi November 30 thleng awh tura tih niin, campaign thupuiah ‘Arajakta Hatao, Loktantra Bachao’ (Remove Anarchy, Save Democracy) tih an hmang a ni.

Campaign hi thawh hniha kalpui a ni dawn a, a thawh khatna hi November 5 thleng neiin, a thawh hnihna hi November 11 aṭangin November 30 thleng neih leh a ni ang.

BJP buatsaih campaign hi ṭhalaite huanga awmze nei zawka democaracy chungchang sawi ho, thudik lo theh darh do letna leh ram ṭha leh nuam dinna tura hma la tura infuihna atana ruahman a ni. BJP chuan eptu pawlten SIR kalpui a nih dan leh thil dang hrang hranga dik lo taka prime minister Narendra Modi leh a kaihhruai sorkar an beihna do letna a ni bawk tih an sawi. BJP chuan PM thlavang a hauh tlat dawn tih an sawi.

BJYM chuan he campaign kaltlang hian interactive session chu ramchhung hmun 600 chuangah ṭhalai mithiam 50,000 te tan a buatsaih dawn a, hei bakah hian essay in ziahsiak leh quiz-te chu ram chhung hmun hrang hrangah huaihawt a ni bawk. BJYM hruaitute chuan college hrang hrang tlawhin zirlai leh ṭhalai mithiam tak takte nen inkawmna hun an hmang dawn a, ṭhalai te tan influencer leh ṭhalai milar bikte nen hmaichhana inbiang biakna hunte an siam dawn a ni.

Hetih lai hian Congress kaihhruaiin eptu pawl bakah Cockroach Janta Party (CJP) chuan SIR kalpui danah thil felhlel a awm nai sawiin, hei hi titawp tur leh, dik lo taka kalpui a nih dana mawhphurtu puh Chief Election Commissioner Gyanesh Kumar chu bang turin an nawr chhunzawm reng a ni. INDIA bloc chaun vote rukbona nasa tak thleng nia sawiin, November 1 hian Ramlila Maidan-ah rally huaihawt leh an tum bawk.